عابدوللها مکتوب
| سلام عابدولله. سوروشمورام نئجه سن. چالیشسام دا آنلیا بیلمه رم سنین دویغولاریوی. دوزون آختاراسان بوگون اوتاندیم. اؤزوم دن چوخ اوتاندیم بوگون عابدولله. آنا دیلی گونو یاخینلاشیب و من تکجه بیر ایمضا ایله آدیمی قاتمیشام دیلیمی ایسته ین آدلار ایچینه و ووجدانیم نئجه ده راحاتلاشیب! عابدولله من سندن چوخ اوتانیرام، نئجه باخاجاغام سنین گؤزلریوه سنی گؤرنده؟ بو گون سن تام 99 گوندور دمیرلر آرخاسینداسان منیم آنا دیلیم اوچون و من هر گون اتوبوس ایله ایشه گئدیرم، یولداشلاریملا دئییرم ده گولورم ده آلیش وئریشه ده چیخیرام! هله بیر بیلسن! هر گون ارگین قاباغیندان کئچیرم عابدولله، اوتانیرام بونو دئمک دن آما هئچ باشیمی قووزاییب دا باخمیرام ارگ قالاسینین نه حاله دوشدویونه. لودرلرین درین درین تاریخیمیزی آلت اوست ائتمکلری وئجیمه بئله دییل. بوگون سن تام 99 گوندور یوخسان بیزلرله و من تورکجه سئوگی مئساژلاری یوللایاندا نئجه راحات آتلاییرام سنین آدیوی تیلفونومدا بیر بیلسن! هر دن اونوتورام بئله سنین هاردا اولدوغونو. اوتانیرام عابدولله. چوخ پیس بیر زیندانا سالیبلار منی! بو زیندانین محبوسلارینا هئچ بیر زاد اؤنملی دییل. هردن بیر نفر قالیر اوتوبوس آلتیندا و هر کس دوز یولونو توتوب کئچیر. هردن تاریخی یئرلرده پاساژ وورولور و هئچ کیم قالدیریم لاردان باشینی دؤنده ریب بیر باخمیر نه لر اولدوغونا. هردن بیر آنانین اوغلونون اؤلوسو چیخیر شاه گؤلونون گؤلوندن، هردن بیر اوشاق فارسجا دانیشیر و بونلارین هئچ بیری اؤنملی دییل هئچ کیمسه یه! بوراسی اؤلولر زیندانی دیر عابدولله. آماندیر گلمیه سن بورا... |  |
+ نوشته شده در جمعه دوم اسفند 1387ساعت توسط سیما دیدار
|
