تورکیه شاعیرلری

اؤزدمیر اینجه

 (1936) 

"مرسین" ده دوغولدو. آنکارا "غازی" اؤیرتیم مرکزینده فرانسا دیلی بؤلومونو بیتیردی. بیر ایل پاریس ده قالدی. موختلیف اورتا اوخول لاردا معلیم اولدو.  TRT ده چئویرمن و یؤنتمن* اولاراق چالیشدی. 1983 ده "ماللارمه" آکادمی سی نین (پاریس) موخبیر عوضویتی نه سئچیلدی. یایین ائولرینده ائدیتورلوق و چئویرمن لیک ایشلری گؤردو، درگی لرده یازار اولاراق چالیشدی. اؤزدمیر اینجه عینی زامان دا شعر نظریه سی نین اوستون ده ائتدیگی موطالیعه لر ایله شعر، رمان و باشقا ترجومه لرله ده ادبیاتیمیزی زنگینلشدیرن صنعتچی لریمیزدن دیر. ایلک شعرلری ایکینجی یئنی*نین اؤزللیک لرینه صاحیب دیر. داها سونرالار خالق شعریندن، "ناظیم حیکمت" دن و چاغداش فرانسا شعریندن تاثیر آلدی. بو قونولارین هامیسیندا ایشله دی. سمبلیک، جالیب تشبیه لر و مجازلارین یئر آلدیغی جوشقولو بیر آنلاتیم لا،ایچ دن، راحات بیر سؤیله ییش له زنگین بیر دیل له یازدی.

اثرلری:

شعر: قارقی*(1963)، صورت جلسه لر (1967)، گیلاس زامانی (1969)، قارشی آلین یازی (1974)، یئله یازیلی دیر (1979)، آلمانین تاریخی (1981)، شهرلر (1981)، یئددی دریالار گئچسن (1983)، سیاست نامه (1984)، اسکی شعرلر (1985)، حایات بیلگی سی (1986)، زوربا* و اوزان (1987)، باشاق ایله ترازی (1989)، برج لار مداری (1989)، جلیقه لری تاوان دادیر (1989)، گونش ساعاتی (1990)، گورله ویک (1990)، گون دؤنومو گون دؤنومو (1992)، یایین سسی (1994)، یوخوسوزلوق (1995)، مانی – های (1998).

سئچکی: دونیا شعر آنتولوژی سی (1987- 1986، 4 جیلد. آ. بهرام اوغلو ایله).

دوزیازی: شعر و گرچک لیک (1985)، سؤز و یازی (1991)، تابولا راسا (1992)، دایناسورجا (1993)، تاریخ باغیشلاماز (1994)، چیلله تؤرن لری (1995)، بو نه بیچیم مملکت (1996)، نه قیزیل نه گوموش (1997، سؤیله شیلر).

اؤدول لری : داش لار، یئنی له مه لر، نرده لر (TDK 1979 ترجومه شعر اؤدولو).

    بیر قوش

بیر قوش اوچوردو "سیسام"لا "قوش آداسی" آراسیندا

آنلیامادیم بیر تهر تورک مویدو یوخسا یونان می

بیر باشقا یئردن می یوخسا؟ هئچ بیر بلیرتی یوخ

دنیزدن سوروشدوم اونو: او بیر غواص قوشدور دئدی

تورلار توخویار دورمادان باغریم دا

گؤک اوزون دن سوروشدوم اونو: او منیم قاصیدیم دیر دئدی

بنفش دن، گول رنگیندن افلاطونا قدر

بالیق لاردان سوروشدوم اونو، قاباق دا کی قوش لاردان

تاباق لاردان سوروشدوم، بایراق لی پرچم لی

هامیسی بیر شئی دئدی بیر جاواب آلانمادیم

بیر قوش اوچوردو "سیسام"لا "قوش آداسی" آراسیندا

آنلیامادیم بیر تهر تورک مویدو یونان می

بیر باشقا یئردن می هانسی میللت دن؟

ای قوش دئدیم، کیم لردن اولورسان، هانسی اؤلکه دن؟

من بیر مارتیام دئدی یاشیم دونیانین یاشیندا

اؤلکه می سوروشسان: یئر اوزو، گؤک اوزو و دنیز

سینیرلاریمی سوروشسان: تورپاق دیر، سو و هاوا

 

    ای اوغول یازیچی اولورسان

ای اوغول بیر گون یازیچی اولورسان

گؤزو گؤزونده اوره یی اوره یینده الی الینده

اینانجین دادینی دئ اؤلکه مین اوشاق لارینا

ای اوغول بیر گون یازیچی اولورسان

قوشقونون توپلانمانین و گؤزله مه یین یازیچی سی

آمان مثل آنلاتما اؤلکه مین اوشاق لارینا

زامان آخیب گئتمک ده داغ داش دییشمک ده دیر

دمیر پاسلانماق دا تمل چورومک ده دیر

آل قلمی بیلدیگین ان گرچک سؤزو یاز

ایندی اود کرپیشی آغاج لار کؤک لری

ایندی آیاغیمیزین زنجیری کوره ییمیزین خنجری

یازیلمامیش شعر آدسیز بوکولو کیتاب

کیشی لریمیز وار آلمانین بیر یاریسی

بیرآز صبر بیرآز اؤفکه بیرآز سارماشیق

سوروسو سوروشولمامیش جاواب بوینو "پیر سولطان"

ای اوغول بیر گون یازیچی اولورسان

سسینی سئو سئوگینی چوخالت اوره یینی آچ

اونو گؤزل اؤلویو آنلات اؤلکه مین اوشاق لارینا

-         - - -- - - - - - - - - - - - - - - - - - - - - - - - - - - -

یؤنتمن: کارگردان

ایکینجی یئنی: تورکیه نین مودرن ادبیاتی نین بیر دوره سی

قارقی: نیزه

زوربا: بوینو یوغون، زور دئین