خوش گلدین دنیز...

بوندان قاباقکی یازینی دنیزه یازمیشدیم. اورمو دنیزینه. بو یازینی دا گؤزل بیر دنیز اوچون یازیرام. ائلیمیزین دنیزی. بیر اومود کیمی قارانلیق گئجه­ نی ایشیقلادان دنیزه. اوره­ یی ان بؤیوک اوقیانوسلاردان داها بؤیوک اولان دنیزه. بو یازینی دنیز قیزیمیز ، رحمتلیک مهندیس امانی­نین گؤره بیلمه ­دییی قیزی، اؤپه بیلمه­ ییب، ساچلارینی اوخشایا بیلمه­ دیی قیزی، دنیز قیزیمیزا یازیرام. دنیز دونن فروردین آیی­نین 20سینده بیر یاشینا آدیم قویدو. دنیز 2 هفته تئز بو دونیایه گؤز آچمیشدی. چونکو آناسینین گؤز یاشلارینی سیلمه ­یه تله­ سیردی. دنیز، بؤیوک بیر دنیز کیمی بوشلوقلارین یئرینی دولدورمایا گلدی. دنیز بیر ائلین غمینی تسکین وئرمه­ یه گلدی.

خوش گلدین دنیز! نه یاخشی کی وارسان یانیمیزدا...

و آشاغیداکی شعری دنیزین آناسی گونش، اونون اوچون دئمیش و دونن بیزلرله ده پایلاشدی:

 

نازلی غمزه­ لی دنیز

ائلین گؤزه ­لی دنیز

آناسی ­نین سئوینجی

غمینه دؤزه ­نی دنیز

              ماهنی­لاردا چاغلایان

              غم گونونده آغلایان

              یولداشلارا لام آخیب

              یاغی یولون باغلایان

                                   آناسی­ نین سئوینجی

                                  غمینه دؤزه ­نی دنیز

ماوی کؤنلو درین­دیر

دویغولاری یام یاشیل

قیزیل اوفوق­لرینده

گونش ایزی گؤرونور

                                 آناسی­ نین سئوینجی

                                 غمینه دؤزه ­نی دنیز

                   آرازین یاراشیغی

                   آتاسین یادا سالان

                   اؤز غملی بئشییینده

                   اوخشامایلا ییرغانان

                                   آناسی­ نین سئوینجی

                                  غمینه دؤزه ­نی دنیز

باغیشلا منی دنیزیم!

بیر زامانلار سنه دنیز دئیردیلر. او زامانلار من اوشاق ایدیم. اوشاقلیق عالمینده سنی چوخ بؤیوک بیر اوقیانوس ظن ائدردیم. آما سندن هئچ زامان قورخمازدیم. چونکو سن هئچ کسی بوغمازیدین. سنی دنیز آدلاندیرارکن سنین قوینوندا بؤیودوک بیز . سنین وارلیغیوا او قدر آلیشمیشیق کی سنین اولماماغین عاغلیمیزدا سیغا بیلمه ییر. بیز حایاتیمیزین سندن آختیغینی تازا بیلمیشیق. سنین بیزه آنا اولدوغونو تازا اؤیرنمیشیق. دئمک عؤمروموز سنه باغلییمیش. سن اولماسان بیزده  یوخ اولاریق. ایندی بیزیم، اؤز اوشاقلاریوین گؤزلری اؤنونده سوزسوزلوقدان چابالایب جان وئرمکده سن!بونا نئجه دؤزمک اولار. دؤزه بیلمه دیم منده. نه الیمدن گله بیلر کی؟ سنه بیر بارداق سو گتیریردیم. یولومو کسدیلر، یولو باغلادیلار، سنه چاتا بیلمه دیم، بارداغی آلیب سیندیردیلار. دئمک سنه سو وئرمک یاساق ایمیش. مگر بورا کربلایمیش دئمک! باغیشلا منی دنیزیم، گؤز یاشلاریمدان باشقا بیر شئی سنه سونا بیلمه دیم!