عابدولله دان اوچ شعر...
یارانیش
بیر قیویلجیم
بیر پیریلتی
بیر سس میدیم
چاغلارین اورتاسیندا
قارانلیق بیر زاماندی
شهوتلی بیر گئجه یدی
فیرتینالی بیر آخشام
پارتلاییشدیر اینسانلیغا یارانیش
گؤی گوموش ماویسی
یئر چامور قاراسی
نه گؤزلدی دنیزلرین قووقاسی
دوداقیندان اؤپسم اؤلوم
سیررینی آلسام یاشام
سن دن می آیریلسام
سنین له قالسام
اللریمین قابارینا قاتیلسام
خاتیرلاسام
اوراخ ، دیرمیخ ، مالاغان
آت آراباسی، خوروم، تیرپان
بیزلره هپ بودور یاشاماق
خاتیرلاماق خاتیرلاماق خاتیرلاماق
سهند
اوجا بیر داغ گزجکسن دلی دورانلار ایچینده
بیل او داغدی
بیل او معصومجا یئکلمیش بیر اوشاقدی
آدی داغدی
فیکره باخسان او نه سولدی نه ده ساغدی
ایزی تبریزده اؤلونجک قالاجاقدی
اؤزو هاردان ، سؤزو هاردان، گؤزو هاردان
بیله مزسن
نه زامان اونلا تانیشدیم
بیله مزسن
چنلی بیر ماهنی نی هاردان اؤپه جکدی
بیله مزسن
کیمی هاردان ووراجاخدی
بیله مزسن
منه
هی هی
دئیه سسلنسه ائشیتمم
اونو گؤرمم
من اؤلوبدور دئیه بیلمم
یوللار
یوللار بویو اوزانمیشام
اوزون یوللار قازانمیشام
چوخالمیشام ، آزالمیشام
یوخلامیشام ، اویانمیشام
من بوزقوردام دایانمیشام
آذربایجان قیزیام.تهران بیلیم یوردون دا ادبیات بؤلومون ده تحصیل آلمیشام.