حاققیمیزی یاشایاجاییق سئوگیلیم...
دوستلار منه توتوقلو قالدیغین گونلردن یاز دئدیلر. من اوردا نه لر گؤردوکلریمی یاخین فورصتده یازاجاغام. آما آشاغیداکی یازینی علیرضانین دوغوم گونونه یازمیشدیم. بیلیرسینیز من اونو گؤرمک اوچون زیندانا گئتدیم. یاغیشلی بیر گون ایدی. 28 گون علیرضادان خبرسیزدیم. نه بیر گؤروشمه، نه بیر تیلفون، نه بیر خبر... . اونلارین بیزیم گؤروشمه میزه ایزین وئرمکلری بیراز شوبهه لی گلیردی منه، آما ندنسه اوره ییمده کی او گؤروش اومودو شوبهه مه اوستون گلدی. او گون توتوقلاندیم و علیرضانی دا گؤره بیلمه دیم. چوخ چیرکین اولدو هر شئی گؤزومده. دونیا چوخ چیرکین ایدی. منه بو حوققا نی وورمایا نه گرک واریدی بیله مه دیم! علیرضا ایلا تام 2 آی بویونجا نه دانیشیب نه ده گؤروشه بیلدیم. اؤز دورومومدان چوخ اوندان خبرسیزلیک منی اینجیدیردی. بازپرس اونون جورمونون آغیر اولدوغونو دئییردی. من ده ایلک دفعه تورک دیلینده مدرسه ایسته یی نین آغیر بیر جورم اولدوغونو اؤیرندیم! بازجولار دا اوندان شیکنجه آلتیندا منیم علیهیمه اعتیراف آلدیقلارینی دئییردیلر. بو سؤزلره اینانمیردیم آما یئنه ده خبرسیزلیک منی چوخ سیخیردی. آزادلیغیمدان سونرا علیرضا ایچه ریده یکن اونون گؤروشونه گئدیب و 2 آی آیریلیقدان سونرا ایلک گؤردوم اونو . او 2 آیدا تیلفون لا دا گؤروشمه میشدیک. سؤزلریمیز چوخ ایدی فورصتیمیز آز. ائله بیر دورومدا سؤزجوک لر آز گتیرر. ال اله وئریب باخیشلاریمیزلا دانیشدیق.
بو یازینی مهر آیی نین 25 علیرضانین دوغوم گونونده یازدیم:
ایلک باخیش یاندیرار دئدیلر. ایلک باخیش داغیدار. ایلک باخیشلاردیر چیرپیندیران اورکلری. سونوندا ائله او ایلک باخیشلاردیر سئودالاندیران. ندنسه بیلمیرم آما من سنین او ایلک باخیشلاریوی خاطیرلامازدیم. ایلک دفعه هاردا گؤردوم سنی؟ سنین منه سؤیله دیغین ایلک کلمه نه ایدی؟ گرچکدن سنین ده ایلک باخیشلارین منی یاندیریب داغیتدیلارمی؟ سنی نه قدر سئودیم؟ سئومک اوچون بیر اؤلچو وارمی؟
جانیم سئوگیلیم! من بو سورغولارا سن یوخ کن جاواب تاپدیم. سنین یوخلوغونون ایلک گئجه سی سحره دک گؤزلریمین اؤنونده ایدی ایلک باخیشلاریوین خیالتی. من او 94 گون آیریلیقدا سنی نه قدر سئودیغیمی آنلادیم. من 2 آی بویونجا سنی گؤرمه دن سونرا ایلک سنی گؤردوغومده همن او ایلک باخیشلارلا قارشیلاشدیغیمی آنلادیم. او محکم باخیشلارین قورخو سالیر سنی اینجیدنلرین جانینا. سنین باخیشلارین هم سئومه لی هم قورخمالی دیر! دئمک ائله من همن او ایلک باخیشلاردان سئودالانمیشدیم. نه دن بئله داورانیرلار بیزه جانیم؟ گوناهیمیز نه دیر بیزیم؟ حاققیمیزی باغیرماق می؟او گون 2 آی سندن اوزاق قالمادان سونرا ایلک سنی گؤردوغومده آنلادیم موتلولوغون سن ایله منه نه قدر ساده بیر شئی اولماسینی. سنینله بیرلیک ده، ال لرین الیمده و اؤنوموزده دونیانین ان دادلی چایی ایله دولموش ایکی ایستیکان! کشکه سرباز او قدر تئز گؤروش واختینین سونا چاتماسینی سؤیله مه سه یدی. موتلولوغون قدرینی، سنین قدریوی و سئوگیمیزین قدرینی بیلدیم. من موتلویام سنله، اومودلویام گله جه یه، نه یاخشی کی وارسان حایاتیمدا. جانیم علیرضام! آدیم آدیم حاققیمیزی یاشاتماق یولوندا سنیله اولاجاغام. موتلق بیر گون تورک دیلینده مدرسه قوراجاییق بو اؤلکه ده. بیزده آدام کیمی حاققیمیزی یاشایاجاییق. بونو سنه سؤز وئریرم. دوغوم گونون قوتلو اولسون. سنی چوخ سئویرم.
آذربایجان قیزیام.تهران بیلیم یوردون دا ادبیات بؤلومون ده تحصیل آلمیشام.