قاتیللردن قورخاردیم من. بیر قاتیلی
بئش آدیم اؤنومده گؤرمک بئله عاغلیما چاتمازدی، قالسین بیر قاتیلله بیر اوتاقدا
گونلر بویو یاشاماق. بیر اینسان نئجه بیر اینسانی اؤلدوره بیلر دئیهردیم. بیر
جانی آلماق! بیر حایاتا ابدییته قدر سون وئرمک! نه قدر آجیماسیز! بیر اینسان بیر
اینسانی نئجه اؤلدوره بیلر دئیهردیم. آما او گون ایلک دفعه اولاراق عؤمرومون
ییرمی دؤردونجو باهاریندا، بیر یوخ بلکه نئچه قاتیلله قارشیلاشدیم. آما اونلارین
قاتیل اولدوقلارینی هله بیلمهییردیم. هله دانیشمامیشدیم اونلارلا. چوخ ماراقلا
اوزومه باخیردیلار. هردن باشدان آیاغا منی گؤزلریله سوزوردولر. سونوندا بیری دیله
گلدی :
-
نه اوچون بورداسان؟
-
بیلمیرم هله!
-
نئجه یانی بیلمیرم؟
-
والله هله بیلمیرم نیه
بوردایام!
-
یوخ دئنه بیلیرم آما ایستهمیرم دئیم.
اؤز
آرالاریندا پیچیلداشماغا باشلادیلار. بیریسی داها دیله گلدی:
-
رابیطهسن؟
-
اودا نه دئمکدیر؟
-
یانی سنی بیر اوغلانینان توتوبلار؟
-
یوخ ائله بیر شئی دییل.
-
ائله هامی اوولده ائله دئیر.
منی بوشونا گتیریبلر، من بیر ایش گؤرمهمیشم! هه! بیزیم قولاقلاریمیز بئله سؤزلرله
دولودور.
-
سن اؤزون نیه بورداسان؟
-
من بیر کیشینی اؤلدوردوم!
-
قاتیلسن یانی؟
-
هن! نئجه یاراشمیر منه؟!
-
یوخ، هئچ عاغلیما گلمهدی آخی. نیه اؤلدوردون اونو؟
-
منه تجاووز ائتمک ایستهییردی.
اؤزو ده فامئلیمیز ایدی. بیزه چوخ گلیب گئدردی. او گون او نییتله منه
یاخینلاشاندا پیچاغی سوخدوم قارنینا او دا جان وئری.
-
ائلهدیرسه او زامان سن
اؤزوندن دیفاع ائتمک ایستهییب سن. بونو قاضیه دئمهدین می؟
-
هن دئدیم، آما قاضی دئدی
قویاردین ایشین گؤرردی سونرا اؤلدورردین اونو.
قیزین
گؤزلری دولدو. بیر قاتیل آغلاماغا باشلامیشدی قاباغیمدا و من ایچیمدن اونو تسکین
وئرمک گلیردی. جئبلریمدن دستمال آختاریردیم. تاپا بیلمهدیم آما، اللریم
یاناقلارینا طرف گئتدی. اسمر، قارا قاش گؤز بیر قیزیدی. ییرمی آلتی یاشیندا
اولدوغونو دا اؤیرندیم آما هله بیلمهمیشدیم اری و دوققوز یاشیندا بیر قیزی دا
وار.
-
ایندی قاضی نه دئییر
سوروشدوم.
-
اؤزونو توپارلادی. بولوزونون
قوللاریلا گؤز یاشلارینی سیلمهیه چالیشدی. ساکیتلشدی. آغلاماییردی داها.
گؤزلریمین ایچینه باخیب دئدی: اعدام!
آردی
وار...
آذربایجان قیزیام.تهران بیلیم یوردون دا ادبیات بؤلومون ده تحصیل آلمیشام.